Ecc 11 | NdeIBE | STEP | Phosela isinkwa sakho phezu kwamanzi, ngoba ngemuva kwezinsuku ezinengi uzasifumana futhi.

Ecclesiastes 11

Isinkwa Emanzini

1 Phosela isinkwa sakho phezu kwamanzi, ngoba ngemuva kwezinsuku ezinengi uzasifumana futhi.

2 Yabela abayisikhombisa, yebo abayisificamibili, ngoba kawuwazi umonakalo ongehlela elizweni.

3 Nxa amayezi equlungene amanzi, anisa izulu emhlabathini. Aluba isihlahla singawela eningizimu loba enhla, silala khonapho esiwele khona.

4 Lowo onanzelela umoya kayikuhlanyela; lowo okhangela amayezi akazukuvuna.

5 Njengoba ungayazi indlela yomoya, loba ukubunjwa komzimba esiswini sikanina, yikho ungeke uzwisise umsebenzi kaNkulunkulu, uMenzi wezinto zonke.

6 Hlanyela imbewu yakho ekuseni, akuthi ntambama uphumuze izandla zakho, ngoba kawukwazi okuzaphumelela, kumbe yilokhu loba yilokhuyana, langabe kokubili kuzalunga ngokufananayo. Khumbula UMenzi Wakho UseseMutsha

7 Ukukhanya kumnandi, njalo kuhle emehlweni ukubona ilanga.

8 Umuntu angaze aphile iminyaka emingaki, kayikholise yonke. Kodwa makakhumbule izinsuku zobumnyama, ngoba ziza zinengi. Konke okuzakuza kuyize.

9 Jabula nsizwa usesemutsha, uvumele inhliziyo yakho ikuthokozise ezinsukwini zobutsha bakho. Landela izindlela zenhliziyo yakho loba yikuphi amehlo akho akubonayo, kodwa yazi ukuthi ngenxa yazo zonke lezizinto uNkulunkulu uzakumisa ekwahlulelweni.

10 Ngakho-ke, xotsha ukukhathazeka enhliziyweni yakho ulahlele kude izinhlupheko zomzimba wakho, ngoba ubutsha lamadlabuzane kuyize.